രജിനികാന്തിനെ നായകനാക്കി നെല്‍സണ്‍ സംവിധാനം ചെയ്യുന്ന പുതിയ ചിത്രമാണ് ജയിലര്‍. ചിത്രത്തിന്റേതായി പുറത്തു വരുന്ന വാര്‍ത്തകളെല്ലാം ആരാധകരെ ആവേശത്തിലാറാടിക്കുകയാണ്.
ഇപ്പോഴിതാ ചിത്രവുമായി ബന്ധപ്പെട്ട് വന്ന ഏറ്റവും പുതിയ ഒരു വാര്‍ത്ത സോഷ്യല്‍ മീഡിയയെ ഒന്നാകെ പ്രകമ്പനം കൊള്ളിക്കുകയാണ്.
ജയിലറില്‍ സാക്ഷാല്‍ മോഹന്‍ലാലും എത്തുന്നു എന്നതാണാ റിപ്പോര്‍ട്ട്. കാമിയോ വേഷമായിരിക്കും മോഹന്‍ലാലിന്റേത് എന്നാണ് പുറത്തുവരുന്ന സൂചനകള്‍.
പ്രചരിക്കുന്ന വാര്‍ത്തകള്‍ സത്യമാണെങ്കില്‍ രണ്ട് കാര്യങ്ങള്‍ ഉറപ്പിക്കാമെന്നാണ് ആരാധകരുടെ പക്ഷം. മോഹന്‍ലാലും രജനികാന്തും ഒരുമിക്കുന്ന ആദ്യ ചിത്രമാവും ജയിലര്‍ എന്നതാണ് ആദ്യത്തേത്.
മൂന്ന് ഭാഷകളിലെ സൂപ്പര്‍ താരങ്ങള്‍ ആദ്യമായി ഒന്നിക്കുന്ന ചിത്രമെന്ന ഖ്യാതി ജയിലറിന് സ്വന്തമാവും എന്നതാണ് രണ്ടാമത്തേത്. കന്നഡയിലെ സൂപ്പര്‍ സ്റ്റാര്‍ ശിവരാജ് കുമാര്‍ ജയിലറില്‍ നിര്‍ണായകവേഷത്തിലുണ്ട്.
2022 ഡിസംബറില്‍ പുറത്തുവന്ന ജയിലറിന്റെ ടീസറിന് വന്‍ വരവേല്പാണ് ലഭിച്ചത്. മുത്തുവേല്‍ പാണ്ഡ്യന്‍ എന്ന ജയിലറുടെ വേഷമാണ് രജിനികാന്തിന്. ചിത്രത്തിന്റെ തിരക്കഥയും സംവിധായകന്‍ നെല്‍സന്റേത് തന്നെയാണ്. തമന്നയാണ് നായിക.
അനിരുദ്ധ് ആണ് സംഗീത സംവിധാനം. സണ്‍ പിക്‌ചേഴ്‌സ് നിര്‍മിക്കുന്ന ചിത്രം ഈ വര്‍ഷം ഏപ്രില്‍ 14-ന് തിയേറ്ററുകളിലെത്തും.
